شعب منافق يعشق جلاديه وهذا ما فعلناه بك

سرقنا لك أموالك وجنى عمرك، وبعدك بتجي لعنا تتوسل لنا أن نعطيك منهم ١٠٠ دولار.

لقد سرقنا رصيدك يلّي كان دولار، وعملناه لبناني على الـ ١٥٠٠ ل.ل.

أنشأنا منصة صيرفة وسحبنا منك على الناعم ما تبقى من أموال، ليستفيد منها زعران ومافيا التجار وعصابات الأحزاب والزعامات.

رفعنا سعر ربطة الخبز، ووقفت متل الشاطر أمام الأفران.

خليناك تنام بالسيارة أمام محطات البنزين، وعملنا سوق سوداء، وبدك رضانا، وصرت تعمل واسطة حتى نعطيك حقك.

خفينا الأدوية، وبطلنا نجيب دواء مدعوم، ورفعنا سعرها بشكل جنوني، وخليناك تترجانا حتى نبيعك الدواء بالحبة.

رفعنا سعر المازوت والغاز، وعملنا عليك مقلب أنو المواد الغذائية مقطوعة، وركضت ورانا لنبيعك علبة حليب وسمنة وما حكيت.

خليناك تدفع كاش قبل ما تفوت عالمستشفى، ورفعنا معاينة الحكيم للـ ١٠٠ دولار، وما فتحت تمك.

ما خلينا تمشي الكهرباء لأن استبدلنها بالمولدات والإشتراك، وانت راضي عم تدفع متل الشاطر.

غلينا اشتراك المياه بأضعاف خيالية دون أن تصلك المياه، وخليناك تعبي من الصهاريج.

رفعنا أقساط المدارس والجامعات بشكل خيالي، وكنا ننظر منك تمرد، لاقيناك عم تركض حتى تدفعلنا.

رفعنا رسوم الموبايل والهاتف الأرضي والإنترنت، والمعاملات الإدارية رفعنا سعرها أضعاف، ومتل الشاطر عم تركض ورانا لتدفع.

سرقنا تعب العسكر الشرفاء والمتقاعدين الأوادم، ولم يرف لنا جفن.

هيدا غيض من فيض، واللي تبين خلال هيدي الفترة أنو شعبنا (لا أعمم) متستر خلف الأقنعة ويستحق كل ما حل به.